Frå KM singel
Av Gunn Magni Angelskår

I Km singel-finalen, spel 42 i runde 21, hadde eg Gjert Harald Raae frå Leikanger som makker.

Eg åpna med mine råtne 11 honnørpoeng (er du i tvil, så meld!), i 1 ruter, sør passa, makker svarte 1 hjerter, nord innpå med spar, og eg fann det for godt å melda kløver – motparten kunne godt få lov til å melda seg opp eit stykke i spar, der eg kunne gjera ugagn. Sør støtta i spar, og makker gjekk i tenkeboksen ei lita stund: ruterdama måtte jo vera noko verd sia makker opna i ruter, så om eg hadde essa i minor, var jo han fri for spar, så her måtte det vera muleg å koma langt! Dermed la han ned 6 kløver, og eg som sat og angra litt på både opning og melding nr to, vart speleførar.

Spar kom ut, eg saka ruter i bordet, på 2 rundar kløver var trumfen ute, og det einaste motparten fekk, var eitt hjertestikk.

Vanlegvis er det ikkje bra å vera i slem med 2 ess borte, men av og til går det bra! Når motparten har meldt og støtta kvarandre i ein farge, er det ofte rett av dei å spela fargen ut, så ikkje speleførar skal få tid til å kvitta seg med tapar i fargen. Sør kan jo sikra beita med å spela ut ruter ess i dette tilfellet, men det vil vanlegvis vera feil etter ruteråpninga… Så 9 poeng inn til ein svett speleførar.